Na Mwandishi wetu, Shinyanga
Ndani ya ukumbi mdogo wenye ndoto kubwa, filamu imeanza kuandikwa Shinyanga.
Jumatano, Januari 14, 2026, kikundi cha sanaa cha SHY TALENT FILMS kilianza rasmi mazoezi yake ya awali, si kama kundi la kawaida la sanaa ya maigizo, bali kama chuo hai cha filamu, maadili na uelewa wa jamii.
hatua hii inadhaniwa kuwa mwanzo wa harakati mpya za kutumia sanaa kama nyenzomuhimu ya sauti ya mabadiliko.
Mazoezi hayo yaliheshimishwa na Mwenyekiti wa Wenyeviti wa Mitaa Manispaa ya Shinyanga na Mwenyekiti wa Mtaa wa Miti Mirefu, Bwana Nassor Mokhe Warioba, akiongozana na Mtendaji wa Mtaa wa Miti Mirefu, Amgelight Emmanuel Mwanri, kushiriki maono hayo.
Mkurugenzi wa Misalaba Media, Mapuli Misalaba, akimshukuru Mwenyekiti wa Wenyeviti wa Mitaa Manispaa ya Shinyanga na Mwenyekiti wa Mtaa wa Miti Mirefu, Bwana Nassor Mokhe Warioba, kwa kushiriki mazoezi ya awali ya SHY TALENT FILMS. (PICHA na Misalaba)
Akizungumza mbele ya vijana hao, Bwana Warioba aliwasilisha ujumbe uliogusa kiini cha safari ya sanaa, ikiwa ni uvumilivu, nidhamu na afya ya kisaikolojia. Alisisitiza kuwa vipaji vingi havifi kwa kukosa uwezo, bali kwa kukosa uongozi unaoeleweka na imani ya kujisimamia.
“Sanaa ni safari ndefu. Msingi wake si umaarufu wa haraka, bali tabia, maamuzi na ujasiri wa kuendelea hata pasipo makofi,” alisisitiza.
Aliipongeza Misalaba Media kwa kuanzisha SHY TALENT FILMS, akitaja mpango huo kama uwekezaji wa kijamii wenye uwezo wa kufungua milango ya ajira, kujiajiri na ujenzi wa tasnia imara ya sanaa kwa vijana wa Shinyanga.
Kwa upande wake, Mtendaji wa Mtaa wa Miti Mirefu, Amgelight Emmanuel Mwanri, aliwataka vijana kuitumia sanaa kama kioo cha jamii na chombo cha kuibua suluhisho, akisisitiza kuwa filamu ina nguvu ya kuhamasisha, kuponya na kubadilisha mitazamo.
Meneja wa Misalaba Media na Katibu wa SHY TALENT FILMS, Daniel Sibu, akizungumza na vijana wakati wa mazoezi akieleza dira ya kikundi kama darasa la maisha na filamu. (PICHA na Misalaba)
Katika hatua iliyopokelewa kwa shangwe, Bwana Warioba alipendekezwa kuwa miongoni mwa walezi wa SHY TALENT FILMS, jukumu alilolikubali kwa kuahidi kuwa mshauri wa karibu katika kujenga maadili, weledi na mwelekeo wa vijana hao.
Mkurugenzi wa Misalaba Media, Mapuli Misalaba, alisema ushiriki wa viongozi hao ni zaidi ya heshima; ni ishara ya imani kwa kizazi kipya cha wasanii wanaotaka kutumia filamu kama lugha ya elimu na maendeleo.
Naye Meneja wa Misalaba Media na Katibu wa SHY TALENT FILMS, Daniel Sibu, alieleza kuwa kikundi hicho kimejengwa juu ya misingi ya nidhamu, uwazi na malengo ya muda mrefu, akibainisha kuwa:
“SHY TALENT FILMS si burudani pekee — ni darasa la maisha, kabla ya kuwa jukwaa la umaarufu.”
Mwenyekiti wa SHY TALENT FILMS, Daniel Elimboto, aliwashukuru viongozi wa serikali ya mtaa kwa moyo wao wa kuunga mkono vijana, akisema ahadi yao ya kuwa karibu na kikundi hicho itaweka msingi wa uwajibikaji na ubora wa kazi.
Mazoezi hayo yalianza kwa mtindo usio wa kawaida: kabla ya script, kulikuwa na maswali; kabla ya uigizaji, kulikuwa na uelewa. Washiriki walihamasishwa kusikiliza, kufikiri, kuhoji na kujifunza kupitia maisha halisi ya jamii wanayotoka.
Kila mshiriki aligeuka kuwa mwanafunzi wa maisha — akitafakari nguvu ya maneno, maamuzi na mchango wa sanaa katika kujenga au kubomoa ndoto.
SHY TALENT FILMS ni kikundi cha sanaa kilichoanzishwa na Misalaba Media, chombo cha habari cha mtandaoni kilichosajiliwa kisheria, mkoani Shinyanga na kanda ya Ziwa
Kwa taarifa zaidi, tembelea ukurasa wao mpya wa Instagram: SHY TALENT FILMS wenye motto “Kuibua vipaji leo, kujenga wasanii wa kesho.”